Tepran sigur á Kyndli

Eftir at kyndlakvinnurnar teir fyrstu tríggjar dystirnar hava fingið rímuliga góð úrslit – javnleik móti VÍF, taptu við bert fýra málum móti Neistanum, og vunnu á Tjaldur – kundi roknast við einum jøvnum dysti í dag, tá kvinnurnar vóru á vitjan hjá Kyndli.

Talan bleiv eisini um javnan dyst, sum okkara kvinnur vunnu tepurt við einum máli. Dysturin var ikki serliga væl leiktur, bæði liðini gjørdu nógv mistøk. Okkara kvinnur høvdu tó munin gjøgnum allan dystin, men móti endanum kom rættiligur spenningur í, tá Kyndil fekk minkað um munin til eitt mál, men okkara kvinnur riðu stormin av og vunnu 21-20.

At frágongdin hevur verið so stór á okkara liðið merkist sjálvandi, tað knípur við at fáa spælið at hanga saman, so her er nógv arbeiða uppá til næsta dyst. Tað hava tær eisini møguleikar til, tí næsti dystur verður ikki fyrren 13.11. á heimavølli móti VÍF.