Christian Jørgensen setti ferð á hondbóltin í Klaksvík

Sum søga felagsins sigur, so er hondbólturin byrjaður í Klaksvík í 1932. Tey mongu fyrstu árini vóru tað bert kvinnur, sum leiktu hondbólt. Seinni komu mennirnir við, og vóru tað fyri ein stóran part fótbóltsleikarar (KÍ´arar), sum eisini leiktu hondbólt. Beinleiðis ungdómshondbóltur var ongin.

Í 1958 kemur danin Christian Jørgensen til Klaksvík at búgva. Pápi hansara skuldi verða bryggjari hjá Føroya Bjór.

Stutt eftir at Christian var komin til Klaksvík, fór hann í timburlæru í Havn. Har fór hann at leika hondbólt við Neistanum, og gjørdist hann rættilig virkin í felagnum. Eitt skifti var hann formaður, og var hann m.a. við til at byggja gamla neistahúsið. Húsið stóð, har ÍSF-húsið stendur í dag.

Í 1965 flytur Christian aftur til Klaksvíkar búgva.

Nakað av hondbólti var í Klaksvík tá, men skipaður ungdómshondbóltur var ongin. Hetta vildi Christian gera nakað við. Hann fór í gongd við at skipa fyri venjingum, bæði fyri vaksin og børn, og undirtøkan var góð. Ítróttarhøll var ongin tá, so vant bleiv út á grúsvølli og í fimleikarhøllini. Men um hetta mundi vóru klaksvíkingar farnir í holt við fyrireikingarnar at byggja ítróttarhøll, og so hvørt sum høllin nærkaðist, vaks áhugin fyri hondbóltinum.

Christian var í mong ár formaður í Stjørnuni, og legði hann rættiliga nógva orku í Stjørnuna. Í nógv ár vandi hann stórt sæð øll liðini hjá Stjørnuni.

Vit kunnu róliga siga, at við Christiani sum formanni og venjara varð grundarlagið lagt fyri tí virksemi, sum er í Stjørnuni í dag.

Vit fara seinni at hava ein samrøðu við Christian um tíðina, hann var aktivur í felagnum.

---