Gentur 14 í steypafinaluni

Við Ionel Georghe sum venjara hava ungdómsliðini hjá okkum ment seg nógv í vetur. Uppmøtingin til venjingarnar er sera góð, og genturnar eru ógvuliga hugagóðar.

Leygardagin vóru hálvfinalurnar í steypakappingunum hjá teimum yngru leiktar. Hjá okkum høvdu gentur 12 og gentur 14 leikt seg til hálvfinalurnar.

Gentur 12 vóru í Havn og leiktu. Tær komu víðari í kappingini. Hóast tað ikki rakk til eitt finalupláss, so vóru tær óførar, og komu at leika um bronsu móti Kyndli, men her blivu tær ov stuttar og taptu dystin.

Hálvfinaluumfarið í steypakappingini hjá gentur 14 varð leikt í KÍ-Høllini. Tað vóru seks lið, sum í tveimum bólkum skuldu kappast um at koma í fianluna. Okkara gentur vunnu allar sínar dystir, og leiktu seg harvið í steypafinaluna. Tað sama gjørdu genturnar hjá Kyndli, sum vóru í hinum bólkinum, tær vunnu eisini allars sínar dystir. Sostatt verður steypafinalan hjá gentur 14 millum Stjørnuna og Kyndil.

Eins og hjá teimum vaksnu so verður gjørt nógv burturúr steypafinalunum hjá teimum yngru liðunum. Tær verða allar leiktar í Høllini á Hálsi komandi sunnudag, t.v.s dagin eftir at steypafinalurnar hjá teimum vaksu eru leiktar.

Leygardagin fara vit mannsterk til Havnar at stuðla okkara kvinnum, sum í steypafinaluni skulu leika móti VB, og sunnudagin fara vit til Havnar at stuðla gentum 14. Koyr á Stjørnan!!