Í døgunum 9.-14. juli skulu gentur 14 hjá Stjørnuni luttaka í Dronninglund Cup, sum er størsta internationala hondbóltskapping í Danmark fyri ungdómslið. Í ár eru umleið 200 lið tilmeldaði og umboða tey 18 lond.
Á Dronninglund Cup verður dentur lagdur á felagsskap, trivna og tryggleika. Umframt hondbólt eru nógvir aktivitetir á skránni, so lagt er upp nakrar spennandi og góðar hondbóltsdagar í Dronninglund. Tað var á einum fundi við foreldrini hjá gentum 14 í vetur, at tosað varð um at geva gentunum eina gularót at arbeiða fram ímóti. Avgerð varð tikin um, at skipa fyri einum uttanlanda hondbóltstúri. Ein foreldrabólkur varð settur at arbeiða víðari við málinum. Við Anton K. Højgaard sum primus motor varð farið til verka, og tað var skjótt, at avgerð varð tikin um, at genturnar skuldu luttaka á Dronninglund Cup 2012. Síðani hevur verið arbeitt miðvíst. Ein tann størsta uppgávan hevur verið at útvega pening.Ymisk tiltøk hava verið fyriskipaði, og hevur tað gingið gott, og fyriskiparnir vilja við hesum takka øllum, sum stuðlað hava. Í ferðalagnum, sum fer úr Føroyum við Norrønu 6. juli verða 12 leikarar og 5 foreldur/leiðarar. Tey verða heima aftur 16 juli. Heimasíðan hjá Stjørnuni ynskir gentunum ein góðan og læruríkan túr. |
Aðrir stuðlar
Úrslitatænastan
|