 Við einum 20-16 sigri á Neistanum tryggjaðu okkara G17 sær í dag fm-heitið Lagt varð upp til eina sanna finalu, tá oddaliðini hjá G17 Stjørnan og Neistin hittust í KÍ-høllini á seinasta leikdegnum. Støðan undan dystinum var tann, at Neistin lá á odda við 21 stigum, meðan okkara gentur á øðrum plássi høvdu 20 stig. Skuldi okkara gentur gera sær vónir um at vinna meistaraheitið, skuldi dysturin vinnast, meðan Neistin kundi klára seg við einum javnleiki. Okkara gentur komu betur frá byrjan, og fingu eina leiðslu uppá 3-4 mál, og hesa leiðsluna hildu tær til hálvleiks. Hálvleiksstøðan var 11-8 til Stjørnuna. Fyrstu løtuna í seinna hálvleiki fyldust liðini, men so kom stíður í málskjótingina hjá okkara gentum. Fleiri upplagdir málmøguleikar blivu misnýttir, og spakuliga minkaði munurin millum liðini. Tað eini løtu stóð á jøvnum, og rættiligur spennigur var í dystinum. Men nærri enn einum javnleiki kom Neistin ikki. Næstu løtuna lá betur fyri hjá okkara røsku gentum at fáa mál, og sást tað á øllum brøgdum, at tær vildu vinna dystin, tær stíddust fyri hvørjum bólti, og tað bar á mál. Endaliga úrslitið gjørdist ein fult uppiborin 20-16 sigur til okkara gentur, og meistarheitið var í hús. Tað vóru nakrar ovurfegnar stjørnugentur sum dansaðu sigurdans, tá dysturin bleiv avblástur. Málini hjá Stjørnuni skutu: Tóra Eliasen 8, Katrin Bertholsen 5, Monika P. Jacobsen 3, Sonja Sirdal 2, Miriam Bethuelsedóttir 1 og Poulina Fuglø 1 Vit ynskja okkara røsku ”stjørnum” hjartaliga tillukku við meistaraheitinum. |
Høvuðsstuðlar:
Aðrir stuðlar
Úrslitatænastan
|