Stjørnan - Kyndil týskvøldið kl. 19

Tað verður botnur og toppur sum bresta saman í KÍ-Høllini týskvøldið kl. 19:00, tá kvinnurnar hjá Stjørnuni fáa vitjan av Kyndil.

Eftir ein steðg uppá 3 vikur um jóla- og nýggjárshøgtíðirnar, verður nú sett hol á seinasta triðingin av hondbóltskappingini.

Kvinnurnar hjá Stjørnini leggja fyri við á heimvølli at leika móti Kyndil, sum kappast við grannarnar úr Neistanum um fyrsta plássið. Í løtuni er Neistin á fyrsta plássi við 22 stigum fyri 13 dystir, meðan Kyndil er á øðrum plássi við 20 stigum fyri 12 dystir.

Stjørnan er í fer við at byggja upp eitt nýtt lið undir kønari leiðslu av venjaranum Per Klarup. Hóast liðið liggur á aftasta plássi saman við StÍF, so hevur ein støðug framgongd verið at sæð gjøgnum kappingina, og tað er við góðum treysti, at tær taka ímóti Kyndil týskvøldið. Í kappingin við Neistan um fyrstaplássið er ógvuliga umráðandi hjá kyndilskvinnunum at vinna dystin, men hvør veit, kanska unga stjørnunliðið kann arga favorittarnar úr Kyndil.

Nú honbóltsfeburin rættiliga ger um seg eftir ótrúðliga avrikið hjá U21 dreingjunum, sum um vikuskiftið hava leikt seg HM-endaspælið í summar, vóna stjørnuleikarnir at viðhaldsfólk teirra møta mannsterku upp týskvøldið at stuðla teimum.

Koyr á Stjørnan!

---